De Fryske adellike militêr Poppo van Burmania (1603-1676) hat mear as fyftich jier tsjinne yn it Steatske leger. Oer syn libben as militêr hat hy in kronyk skreaun ûnder de titel Enege geschiedenissen. Dy 'Geschiedenissen' omfieme net allinnich wat hy belibbe hat as militêr, mar biede bytiden ek nije ynformaasje oer ferskate saken lykas de pest, walfisken, anekdoates, patronaazje en it deistich libben. Wiebe Bergsma hat de tekst tagonklik makke mei in wiidweidige ynlieding en dito ynformaasje. Ein 2009 sil de kronyk yn boekfoarm útbrocht wurde.