Alle boarnen út dit tiidrek binne sammele en útjûn, foar it measte yn de rigen Estrikken fan it Frysk Ynstitút fan de Universiteit fan Grins. De Fryske Akademy hat al dat materiaal digitaal opslein yn de taaldatabank 'Midfrysk'. It korpus is fierhinne folslein lemmatisearre. Dat wol sizze dat alle wurden oan in lemmafoarm ( = de opsykfoarm yn in wurdboek) keppele binne en dat útmakke is hokker foarm it is; bgl. hokker persoan en tiid fan in tiidwurd, of inkeltal of meartal fan in haadwurd, ensfh.

It korpus befettet likernôch 0,5 miljoen tokens mei foech 80.000 ferskillende wurdfoarmen fan 21.000 ferskillende lemma's. Frysk materiaal út dat tiidrek dat noch net bekend en útjûn wie, is okkerlêsten ferskynd as Frysk fan 1550 oan 1801, útjûn fan Philippus Breuker, Estrik/Ålstråk 82, Grins/Kil/Ljouwert, 2008.  De sprekwurdsamling fan Burmania (1641) is mei wiidweidich kommentaar útjûn troch Frits van der Kuip yn De Burmaniasprekwurden (Ljouwert 2003).

De Taaldatabank jout tagong ta de teksten en it sykprogramma op wurden en wurdfoarmen. Jo hawwe twa sykmooglikheden om in Midfrysk wurd yn syn kontekst en fan dat wurd de ûnderskate (bûgings)foarmen te besjen: troch in Midfryske foarm of de Nijfryske lemmafoarm yn te typen. De opmaak fan de side en de sykmooglikheden wurde yn de rin fan 2008 ferbettere en útwreide. Op de side kinne jo jo oanmelde as brûker fan de taaldatabank. Folgje de ynstruksjes op it skerm. By problemen kinne jo kontakt opnimme mei Arjen Versloot.

Teksten dy't skreaun binne yn it Hylpersk, Molkwarders of Skiermûntseagersk fan dy tiid, binne yn de taaldatabank yn in apart dielbestân 'Dialfoar1800' ûnderbrocht. Bestudearring fan dit âldere Frysk mei help fan de Taaldatabank hat in list fan lokalisearre auteurs en teksten opsmiten. Der binne ek guon anonime teksten by, dy't op basis fan ynhâld en taalskaaimerken te lokalisearjen wiene. De lokalisaasjes binne brûkber foar histoarysk dialektûndersyk.