De gritenij Haskerlân of Haskerfiifgea ûntstie yn de 15de ieu as in gearwurkingsferbân tusken de fiif tsjerkedoarpen Aldehaske, Haskerhoarne, Nijehaske, Westermar en Sniksweach. Justjes letter waarden ek De Jouwer en Haskerdiken as doarpen meirekkene. Yn 1934, doe't de gemeente Hearrenfean ta stân kaam, waard Haskerlân útwreide mei it westlik part fan Skoatterlân: Rotsterhaule, St. Jansgea, Reahel, Rotstergaast en Dolsterhuzen.

Fanâlds wie yn Haskerlân de lânbou it wichtichste middel fan bestean; allinne yn it grutste plak, De Jouwer, en yn Nijehaske, no part fan It Hearrenfean, wennen in soad ambachtslju, keaplju en skippers. Troch it ferfeantsjen fan it leechfean en it letter droechmeitsjen fan de grutte wetterplassen dy't troch dat ferfeantsjen ûntstien wiene, is it lânskip fan Haskerlân yn 'e rin fan de 18de en 'e 19de ieu gâns feroare.

Yn dit boek - ien fan de grutste gemeenteskiednissen dy't oan no ta yn Fryslan útjûn is - behannelje alve auteurs oan 'e han fan in soad net earder brûkt argyfmateriaal, yn fjirtjin bydragen in tal wichtige en nijsgjirrige aspekten fan de skiednis fan Haskerlân.

Gildemacher, K.F., L.G. Jansma en H. Spanninga (red). Haskerlân. In tal bydragen ta de skiednis. Fryske Akademy Ljouwert 1990. Akademy-nûmer 726. ISBN: 90 6171 726 4. Rige stêds-, doarps- en streekskiednissen nûmer 3. 479 siden. Priis € 18,00 / foar leden en stipers € 16,00.