Doel fan it ûndersyk is ynsjoch te jaan yn it tinken dat útgiet fan folk (it Fryske folk) en lân (de Fryske grûn). De eleminten dêrfan binne werom te finen op it mêd fan it tinken oer folkskunde, literatuer, skiednis fan Fryslân, Fryske Beweging, agraryske polityk, ekonomyske ûntjouwing, antropology. Dat binne de boustiennen fan (de ferskate ferzjes fan) de Frysk-nasjonale ideology sa't dy him tusken de beide wrâldoarlogen oppenearre. De resultaten fan it ûndersyk sille yn in monografy presintearre wurde. De publikaasje sil ein 2008 ferskine.

Resinte publikaasjes gongen oer de Fryske literatuer yn 'e Twadde Wrâldoarloch, de suvering fan 'e Fryske Beweging (1945-1946), de oprjochting fan 'e Fryske Akademy (1938), it folkskundich ûndersyk yn Fryslân tusken 1920 en 1945 en Douwe Kiestra.

J. Frieswijk