It Fryske sulver is wrâldferneamd. Yn de Ier-Moderne Tiid wie Fryslân in ryk gewest en syn boeren en boargers lieten dat graach sjen yn allerhanne sulveren en gouden dingen, dy’t se ek as belizzing brûkten. Oer de objekten sels is it nedige bekend, mar net oer de minsken dy’t se makke hawwe. Drs. Peter Schoen fan it Hearrenfean makket stúdzje fan de maatskiplike posysje fan de goud- en sulversmidden, wêrby’t er de lins skerp stelt op Boalsert om’t der gâns argyfmateriaal foar dy stêd beskikber is. Syn oandacht giet ûnder mear út nei de sosjale eftergrûn fan de edelsmidden, har posysje yn it stedsbestjoer, har famyljerelaasjes, har religieuze oertsjûging en har partisipaasje yn it gilde. It ûndersyk dat útmûne moat yn it proefskrift, stiet mei ûnder begelieding fan prof.dr. J.A. Mol. Peter Schoen is bûtengewoan lid fan de fakgroep skiednis.