Binnen de Fryske Akademy (FA) en dêrbûten, net yn it lêste plak by dejingen dy’t beropsmjittich (amtlik) Frysk skriuwe, libbet al langer it ferlet fan in nij Nederlânsk-Frysk (N/F) wurdboek. 
In nij N/F wurdboek sil in online wurdboek wurde. De brûker stiet yn ‘e hiele ûntwikkelfaze sintraal. Dêrta sil in sa goed mooglik brûkersprofyl opsteld wurde.
As tarieding op it skriuwen fan in nij N/F wurdboek, wurdt  al it by de FA oanwêzige digitale leksikografyske materiaal keppele. Wat noch net digitaal is, wurdt digitalisearre. It keppele materiaal sil de leksikografen in hechte basis jaan foar it nije wurdboek. Der wurdt nei stribbe om it keppele materiaal sadree’t dat kin online te bringen yn in saneamd wurdboekportaal. Op dy manier ha de brûkers, salang’t it nije wurdboek der net is, in oersethelp dy’t  gâns mear biedt as it N/F wurdboek fan 1985.
Yn it wurdboekportaal wurde opnaam:

• It Nederlânsk-Frysk wurdboek (1985)
• It Frysk-Nederlânsk wurdboek (1984)
• It Juridysk wurdboek (2000)
• Underskate terminologylisten (offisjeel ferkear, itensiederswurden, saakfakken)
• It Frysk Hânwurdboek  (2008)

Projektútfierders: Piter Boersma, Anne Dykstra, Pieter Duijff, Frits van der Kuip, Hindrik Sijens
Kontaktpersoan: Anne Dykstra.