De nijste publikaasje yn 'e rige Regional Dossiers fan it Mercator Research Centre presintearret trije talen fan 'e lânseigen befolking yn West-Sibearië. Dy talen – it Nenets, Khanty en Selkup – wurde praat yn it autonome distrikt Yamalo-Nenets, oan 'e eastlike kant fan de Oeral.
It Mercator-dossier is skreaun troch Roza Ivanovna Laptander, saakkundige fan it Nenets en ûndersiker oan it Arctic Centre fan 'e Universiteit fan Laplân en gastûndersiker oan it Arctic Centre fan 'e Ryksuniversiteit Grins. De publikaasje jout in oersjoch fan 'e skiednis en demografy fan 'e trije talen en beskriuwt yngeand de hjoeddeiske sitewaasje op it mêd fan ûnderwiis en wetjouwing.
Ferlykjend ûndersyk
De rige Regional Dossiers fan Mercator jout in feitlik oersjoch fan de status fan minderheidstalen yn it ûnderwiis yn ûnderskate Europeeske regio's. Om't de publikaasjes opboud binne neffens in fêste struktuer, binne se ek brûkber foar ferlykjend ûndersyk. It dossier oer it Nenets, Khanty en Selkup is it earste dat in taal bûten Europa ûnder de loep nimt.
Download (pdf-dokumint):
- Roza Ivanovna Laptander: Nenets, Khanty and Selkup: The Nenets, Khanty and Selkup language in education in the Yamal Region in Russia (2016).
It ôfrûne jier binne fierder noch sân dossiers ferskynd:
- Anke Tästensen: German: The German language in education in Denmark (2015).
- Beate Brĕzan and Mĕto Nowak: Sorbian: The Sorbian language in education in Germany (2nd edition, 2016).
- Ronald Verra: Ladin: The Ladin language in education in Italy (2nd edition, 2016).
- Xosé-Henrique Costas and Andrea Expósito-Loureiro: Galician: The Galician language in education in Spain (2nd edition, 2016).
- Iris Orosia Campos Bandrés, Juan Pablo Martinéz Cortés, and Santiago J. Paricio Martín: Aragonese: The Aragonese language in education in Spain (2016).
- Helen Ó Murchú: Irish: The Irish language in education in Ireland (2nd edition, 2016).
- Fiona McArdle and Robert Teare: Manx Gaelic: The Manx Gaelic language in education in the Isle of Man (2016).
Wa't graach in printe ferzje fan in dossier ha wol, kin dêrta in berjocht stjoere nei Rixt van Dongera (e-mail) of Richt Sterk (e-mail).