Akademydei
It nije akademyske jier begjint foar de Fryske Akademy mei de fiering fan de dies natalis, de dei fan de oprjochting fan it ynstitút. Alle jierren nûget de Fryske Akademy - op de freed fan, foar of nei de 10e septimber - de leden, stipers en relaasjes út om mei-inoar werom te sjen op it ôfrûne jier, mar foaral om mei-inoar foarút te sjen nei moaie gearwurkingen, projekten en wittenskiplike útdagings. Op de Akademydei wurde tradisjoneel de nije leden fan de Fryske Akademy beneamd.
Akademydei 2026
De Akademydei 2026 is op freed 11 septimber 2026.
Oer de Akademydei
Mei de stipe fan de Kommissaris fan ’e Keningin Harinxma thoe Slooten fûn op 10 septimber 1938 de offisjele iepeningsgearkomste fan ’e Fryske Akademy plak. It earste bestjoer waard foarme troch de hearen P. Sipma (foarsitter), J.H. Brouwer (skriuwer), prof.dr. J.F. Koksma (skathâlder), prof.dr. G. Gosses, prof.dr. J.M.N. Kapteyn, prof.dr. G.S. Overdiep en dr. G.A. Wumkes. Earefoarsitter wiene doe mr. P.A.V. Baron van Harinxma thoe Slooten, eareleden wiene N. Ottema, prof.dr. Sir William Craigie (Universiteit fan Oxford) en prof.dr. Theodor Siebs (Universiteit fan Breslau).
De Fryske Akademy fûn ûnderdak yn it Coulonhûs yn Ljouwert, dat boud wie yn 1713. In ‘buitengewoon gaaf monumentje", aldus notaris Nanne Ottema. Om it wittenskiplik karakter klam te jaan, waard, op útstel fan pater Titus Brandsma, keazen om it segel fan de Frjentsjerter Bibleteek as logo te brûken. Mear hjiroer kinne jo lêze yn it oersjoch '85 jier Fryske Akademy’.
Akademydei 2025
Yn BOEL yn Ljouwert waard de Akademydei tradisjoneel iepene troch prof.dr. Nelleke IJssennagger-van der Pluijm, direkteur-bestjoerder Fryske Akademy. Jantine van der West, meiwurker Citizen Science en Kennisbenutting fertelde oer ‘Citizen Science en wurkmienskip’. Martine Jansen, ûndersyksmeiwurker by it Mercator Europeesk Kennissintrum foar Meartaligens en Taallearen, dat ûnderdiel is fan de Fryske Akademy, fertelde oer it ynternasjonale projekt ‘Read with Multilingual Early Education’. Martijn Kingma, promovendus Taalwittenskip, hie in lytse kwis oer ‘Perseptuele dialektology: Fryske aksinten op ’e kaart'.
Tuskentroch wiene mini-kolleezjes op fideo te sjen mei Han Nijdam (‘Wat wie de rol fan de frou yn it Aldfryske rjocht’), Anne Merkuur (‘Feroaret it Frysk stadichoan yn it Nederlânsk?’), en Nelleke IJssennagger-van der Pluijm ( ‘Sprutsen de fikingen ek Frysk?’). Fansels waarden ek nije leden beneamd. Liuwe Westra spruts de laudaasjes út foar Syds Wiersma en Piter Tjeerdsma.
Akademydei 2025 - fotografy troch Marieke Balk
Akademydei 2024
Tusken de iuwenâlde beammen en gebouwen, yn de histoaryske binnentún fan it Coulonhûs yn Ljouwert, hat de Fryske Akademy op freed 13 septimber 2024 it 85ste jubileumjier feestlik ôfsletten. Mei gasten as Kommissaris fan de Kening Arno Brok, boargemaster fan Ljouwert Sybrand Buma en dichter fan Fryslân Arjen Hut, mei de beneaming fan de leden Eppie Dam en Ammerins Moss-de Boer, mei de útrikking fan de skripsjepriis oan Sannah Debreczeni (en in earfolle fermelding foar Herman van Vliet), mei in lêzing fan Henk Wolf, en mei muzyk fan Hot & Toasty, kinne we weromsjen op in goed slagge dei. De foto's binne makke troch Marieke Balk.
Fotoreportaazje 2024 >>>