Al sûnt de oprjochting fan de Fryske Akademy yn 1938 wurde jierliks nije Akademyleden beneamd. Akademyleden binne persoanen dy’t op in positive en oantoanbere wize in bysûndere bydrage levere hawwe op it wittenskiplik dan wol maatskiplik mêd fan de Fryske taal, kultuer en Fryslân yn it algemien.
 

Beneaming

Stipers, meiwurkers en leden fan 'e Fryske Akademy kinne it hiele jier troch minsken foar beneaming ta lid fan 'e Fryske Akademy foardrage. Op de Akademydei wurde nije leden beneamd troch de direkteur-bestjoerder, dy't by de beoardieling fan de foardracht stipe wurdt troch de beneamingskommisje.

Foar in beneaming fan de Akademydei fan freed 11 septimber 2026 moatte foardrachten op syn lêst op tiisdei 31 maart 2026 yntsjinne wêze by de ledebeneamingskommisje. 

It yntsjinjen fan in foardracht ferrint fia it online formulier op dizze webside. Wy freegje dêrby jo omtinken foar it folgjende: 

• As oriïntaasje kinne jo de fragelist hjir online rieplachtsje. (Tink derom: de taheakke is allinnich bedoeld ta besjen; it ynfoljen en yntsjinjen fan it online formulier is ferplichte).
• Wy fersykje jo om it formulier folslein en mei soarch yn te foljen. Allinnich folsleine foardrachten kinne troch de ledebeneamingskommisje yn behanneling nommen wurde.
• It ynfoljen fan it online formulier duorret likernôch sa'n 50 minuten.

Fuort by it oprjochtsjen fan 'e Fryske Akademy yn 1938 waarden al hûndert minsken beneamd ta lid. It wie doe de bedoeling dat dy leden wurk foar de Fryske Akademy dwaan soene, mar der is noait in offisjeel ûnderskied makke — sa't yn dy tiid wol barde by oare ynstellingen — tusken gewoane en wurkjende leden. Likegoed hawwe troch de desennia hinne in protte leden harren ynset foar de mannichfâlde wurkgroepen en wurkferbannen fan 'e Fryske Akademy.

Hjoed-de-dei binne leden foar de Fryske Akademy wichtich as ambassadeurs, dy't oantrune wurde om aktyf mei te tinken op it mêd fan it wittenskiplik ûndersyk en de maatskiplike posysje fan 'e Fryske Akademy. Mar boppe alles is it lidmaatskip in erkenning fan immens wittenskiplike of kulturele fertsjinsten.

Op it stuit hat de Fryske Akademy sa'n 240 leden.